Monday, February 4, 2008

Chaand ke saath kai dard puraane nikle

Amjad Islam Amjad ...

chaand ke saath kai dard puraane nikle
kitne gham the jo tere gham ke bahaane nikle

fasl-e gul aai phir ik baar asiraan-e-vafaa
apne hi khuun ke dariyaa mein nahaane nikle

hijr ki chot ajab sang-shikan hoti hai
dil ki befaiz zaminon se khazaane nikle

umr guzri hai shab-e-taar mein aankhen malte
kis ufaq se mera khurshid na jaane nikle

kuu-e-qaatil mein chale jaise shahidon kaa juluus
khvaab yuun bhigti aankhon ko sajaane nikle

dil ne ik int se taamir kiya taaj mahal
tu ne ik baat kahi laakh fasaane nikle

dasht-e tanhaai-e-hijraan mein khadaa sochta huun
haaye kya log mera saath nibhaane nikle

main ne 'amjad' use bevaastaa dekha hi nahin
vo to khushbuu mein bhi aahat ke bahaane nikle

0 Opinions:

Archives